Africa Mungdan, Zinbabwi de shaning shagun, South Calorilina, United Medodist Church kaw nna, sasana magam sa galaw shakut nga ma ai hta,Wunpawng shayi rai nga ai, Srm. Maran Kai Nang mung,shanglawm sa garum nga ai lam chye lu ai.Srm. Maran Kai Nang gaw, Nutritionist langai rai nna, South calorina, Nutrition Department kaw , bungli gaba galaw nga ai re hte,Shi gaw, Sara Kaba Rev: Maran Yaw a kasha re hpe mung chye lu ai.Shi hte rau, Mr. Alton Euwing ( Hospital Administrative), Rev. Gery, Mr. Howard Agnew, hpung ni gaw, Zinbabwi na, matsan masha ni hpe tsi lajang ai, tsi rung kaw ra nga ai,arung arai ni hpe sa lajang na matu sa du ai re lam hpe mung chye lu ai. Zimbabwi kaw na masha ni a a-sak gaw,galu dik htum 35 ning re ai lam hte, mung dan masha 4 hta na, marai langai ,(4:1) gaw, AIDS ana byin nga ma ai nga nna, Srm. M.Kai Nang, Kachin Today de tsun ai. “ Mungdan grai matsan ai majaw gaw, shanhte hkai ai, hkai nu, nai tong hta lai nna, hpa sha na n-nga ai, masha malawng maga hte AIDS a majaw kanu kawa nlu mat sai ma ni gaw, Old Mutari sasana wang e sha kam hpa nna, nga ai re” nga nna mung, shi matut tsun dan ai.Sasana kaw nna, yu bau da ai, dai ma ni hpe laika atan tsan 5 du hkra sha ,sharin ya lu nna,dai hpang gaw, shanhte hkrai shanhte tam sha nna, asak 35 ning du hkra asak hkrung lu ma ai re hpe mung chye lu ai.Ndai zawn rai,kaga amyu sha ni a lapran e, magrau grang let,mayank mahkak ni hpe,garum shingtau lawm nga ai , Srm.Maran Kai Nang gaw, “ anhte Wunpawng amyu sha ni a shawnglam hta dai zawn n-byin hkra, ya kaw nna, grai shadi, maja ra na re”, nga nna shi a myit tsan ai lam hpe, Kachin Today de tsun wa ai.

K T G Na shaw da ai re.