Content feed Comments Feed

Umhta Brang a Hkam sha lam ni

Posted by nzk Sunday, November 16, 2008

UMHTA BRANG JAPAN DU SAI

I. Lai wa sai 2005-2007 ning laman, Umhta Brang gaw Malaysia, Singapore, Bangkok, Chiang Mai kaw na wuhpung wuhpawng ginra ni de du hkawm let tsaban 21 mungkan ntsa e asak hkrung hkawm sa na rai nga ai Jinghpaw Wunpawng shayi shadang ni hte hkrum zup ai lam, amyu sha hkrun lam hte seng nna numhtet numra gamung jahta ai lam galaw lu sai rai.

II. Japan mungdan de du nga ai anhte a Buga na amyu shayi shadang sha ni hpang de October 15 ya shani kalang mi bai du lu sai; laiwa sai shaning 1986 e du yu ai hte grai shai mat sai: shaloi Umhta Brang a hkam la ai ningmu mung shai mat na zawn byin ai majaw, lawu na hte maren loi mi sharai nna tang madun dat n.ngai rai.

Anhte Jinghpaw Wunpawng prat ram shayi shadang sha ni, Japan mungdan e, nde wa law htam nna kun dinghku hte nawng, kashu kasha hte mawng shanu nga sai gaw anhte a Buga, karing karang mungdan de bai nhtang wa na re gaw, mai byin sana kun? Anhte a daidaw buga hpe nja nhpra let shakram kau da masai kun?

Jinghpaw Wunpawng amyu sha tai shakut na malai, English ga, Japan ga, Miwa ga, Korea ga ni tsun jahta ai wuhpung wuhpawng de pyaw hkawm ai mungkan amyu masha mahtang tai ai gaw kaja sai, ngu na kun?

Lahta e tang madun ai ga san ni hpe nlu htai ai-October shata 26, ya Laban a matu mungga lajang ai shaloi, shawoi na Chyum mungga hpe sha tsun jahta na kun?,shing nrai amyu sha asak hkrung lam hpe madung hku nna tsun dan na kun?, Umhta Brang a Theology jam jau hkrum sai.

" Tsaban 21 prat na globalization a mabyin a majaw rai nga sai" ngu mara shagun ai hpe myit hkrum lawm na ga ai. Prat ram shayi shadang sha ni a myit mada shara hkraw hkun ai anhte a Jinghpaw Buga kaw hkring sa shara htum mat sai zawn hkam sha ai majaw, prat dep hpaji tam bram na matu, ja gumhpraw tam shakut ra ai majaw, galai shai ai mungkan a hka leng ntsa e shang manau lawm ra sai majaw, tinang shanu nga ai wuhpung wuhpawng kaw nna dam lada ai wuhpung wuhpawng de du hkawm nga ai kanau kasha ni hpang de Umhta Brang hku nna, marai hkum shagu nshut nshai, nhprai ai sha hkam la ra ai Ting gyeng ga sadi amyu (3) hpe shadup shatik lu myit ga, htet shana dat n.ngai rai.



Ga Sadi (3)

1). Ngai Jinghpaw Wunpawng amyu shayi/shadang gaw, Karai Kasang hpe kam sham ai asak hkrung lam kaw nna galoi mung nhprai ai sha, ngai hpe hkye hkrang la ai Madu Yesu a chyeju hpe myit dum let, Sasana hkrun lam hta mung, man ang ai made ap nawng gun hpai shakut shaja nga na n.ngai.( Rai sa, shing nga saga ai.)

2). Ngai Jinghpaw Wunpawng amyu shayi/shadang gaw tinang a chying hkai kanu kawa, mayu dama, kahpu kanau, amyu ru sai baw pa hpe tsawra nja nhpra myit hte matut mahkai nga let, hku hkau ai lam hta mala hka ai hku nbyin hkra shakut na n.ngai: tinang gaw Jinghpaw Wunpawng amyu hta kadai rai nga ai ngu ai shingteng masat "Identity" n shamat ai sha asak hkrung na n.ngai.( Rai sa, shing nga saga ai.)

3). Ngai Jinghpaw Wunpawng amyu shayi/shadang gaw, tinang a amyu htung hking hpe myit masa hku nna mung, arawn alai hte mung, tsun shaga ai hku nna mung, ta tut maka shapraw ai hku nna mung hkungga la ra let makawp maga nga na n.ngai; amyu sha ni a rawt jat galu kaba lam hpe mung, kabu gara let madi shadaw, n.gun jaw lawm na n.ngai. Tinang amyu hpe myit yu kaji ai lam n.galaw na,tinang amyu hkrat sum wa shangun ai bungli hta galoi n.shang lawm ai sha, Karai Kasang kaw akyu hpyi ya ai hku nna mung shang lawm na n.ngai.( Rai sa, shing nga saga ai.)

Lahta e ka madun da ai ga sadi (3) hta naw ka jat bang mayu ai rai yang, laika hti ai ni yawng a ra sharawng ai hku rai u ga.

III. Tsaban 21 mungkan de lahkam htawt nshut u ga………….

Umhta Brang gaw Bangkok ( Suwarnabhum ) nbungli dabang kaw nna Narita nbungli dabang de hkawm ai hkrun lam hta, Myen mung na mung chying sha shabrang (3) hte dung hkrup nu ai. Hkrun lam e gamung jahta ga ai; shaloi mung chying sha shabrang wa, Umhta Brang hpe tsun dan ai gaw, " Kachin" ni gaw anhte amyu hpe dep lu na matu shaning (20) ning shachyut ra na manit dai, ngu kamak jaw ai hkrum nu ai. ( Mungchying sha dai wa kadai amyu re ai hpe ndai kaw nka madun na re.)

Daini anhte Jinghpaw Wunpawng amyu sha ni, Karai Kasang hpe hkap la kam sham ai, Madu Yesu Hkristu hpe Hkye la Madu shatai let, asak hkrung ai hkrun lam gaw lagaw lahkam htawt nshut sai, ngu hkam la saga ai,; raitim, mung masa lam, sut masa lam, hpaji lam, Htung hking lam, nga sat nga sa, asak hkrung lam ni hta gaw lahkam htawt jaw sai zawn nawn ai she rai nga ai_ lahkam htawt shut ai kun; lahkam htawt njaw ai kun; lahkam htawt ai tang ndu ai kun? Lama ma hta dut dang nga sai.

Umhta Brang e masam maram yu ai made tsun ga nga yang, anhte Jinghpaw Wunpawng amyu sha ni gaw ya aten hta Madu Yesu a ga shadawn ( Mahte 7:27 ) kaw tsun ai the maren "………de a kadawng daw mat ai gaw nyawp rai nga ai…." ngu ai hpe bai dum ra na ga ai.

1). Ningbaw ningla bungli galaw ai shaloi makam masham kasi hpe hkridun n.shatai ai lagaw lahkam;

2). Tinang hku nna, Ningbaw Ningla byin tai wa ai shaloi, hpa lam hta mung, tinang hta grau ai n.nga ra sai, ngu sawn la shut ai lagaw lahkam;

3). Ningbaw Ningla ni chye mai ai hpaji hpe tinang nan, madu nan n.sharin la, nchye tawn ai she, maigan wa hpe chyu kam nna bungli shangut chye ai lagaw lahkam;

4). Amyu hpe tsawra ai ngu ai hta, rap ra ai tara hte teng man ai, tsawra matsan dum ai myit nlawm ai lagaw lahkam;

5). Yesu Hkristu hte kahkyin gumdin shakut na malai, htung hking hte ja gumhpraw hpe arang shatai let, amyu sha lam yan hpe gaw gap ai lagaw lahkam;

6). Amyu sha lam yan gaw gap shakut ai shaloi, tinang a tinggyeng rawt galu kaba lam hte kapyawn let woi awn ai lagaw lahkam ni hpe jahkring kau lu yang she anhte a wuhpung wuhpawng bai ngang kang wa na re.

Myit yu na matu hpaji jaw ga;

· Masing masa nlawm ai mung masa( Politics without Principle )

· Magam bungli n.galaw ai sha lu la ai sut gan ( Wealth without Work )

· Krawdung myit masin nlawm ai pyaw daw kadaw ai lam ( Pleasure without Conscience )

· Akyang lailen nlawm ai machye machyang ( Knowledge without Character )

· Arawn alai kata ai shakut shaja ai lam ( Industry without Morality )

· Shinggyin nau na myit nlawm ai hpung tang hpaji ( Science without Huminity )

· Apnawng hkungga nlawm ai Nawku daw jau lam ( Worship without Sacrifice )

George Edgar Shankel, " God and Man in History", ( Nasvillee, Southern Publishing HSSO: 1957-Page-85 )

Umhta Brang ( KTC )

Matsing :: Ndai laika ngau hpe, madu A ahkang nhpyi ai sha tang madun dat ai lam hpe mara dat ya na matu hpyi nyem dat n ngai .

3 Responses to Umhta Brang a Hkam sha lam ni

  1. NBWI SAM Says:
  2. Laika hti mat ai. Atsawm kalang bai hti na.

    Hti ging ai laika re. Baw nu hpe jasu ya ai majaw chyeju kaba sai.

     
  3. Rsj Says:
  4. Myitsu wa ka da ai hpe ram daw myitlawm hkum lawm , myi she n grip hkra sa hti matsing la mat sai,grai kaja ai ga shaka, yin la ra ai lam ni hpe mung ahtsawm sha sa yin la mat ne ai, laika chye ka dik ai hpe yu na laga mi dinlung na lam n mu sai hku re, matut na mung chye mai gin ai lam ni hpe matut n gun jaw nga na n ngai :)

    Wp shadang
    Rsj...:)

     
  5. Rsj Says:
  6. Ga shaka ni sa yin la sharin ahkyin ai lam ni sa hkawm la rai n ngai loi, Myitsu wa ka da ai hpe yu na myitlawm ,hkum lam,myi she n grip rai sa hti matsing la mat sai hku re loi, ka da ai lam ni hkrak sha rai taw na laga mi dinlung ai lam n nga sai hku re :) matut na mung chye gin ai laika ni hpe mung n hprai ai sha matut shakut ya rit ngu :)

    wp shadang
    Rsj................:)

     

Post a Comment

Matut mahkai mayu yang

Dau Hkawng 0064-06 3683872 h/p 0210642851 donghkong@gmail.com